0

Мьянма: Мухолифатнинг 70 ёшли етакчиси ҳашарда иштирок этди

Ўтган ойда ўтказилган парламент сайловларида ғалаба қозонган Мьянмадаги мухолиф партия етакчиси Аун Сан Су Чжи пойтахт кўчаларидаги ободонлаштириш ишларида иштирок этди. 13 декабрь куни ушбу 70 ёшли сиёсатчи хоним ўз партиядошлари билан бирга кўчага чиқиб, атрофдаги чиқиндиларни йиғиштира бошлаган. Тез орада унга маҳалла аҳолиси қўшилган. Қайд этиш керакки, охирги ярим аср давомида Мьянмада ҳукуматни ўз қўлида тутиб келган ҳарбийлар охирги йилларда, хусусан 2011 йилдан бери бошқарувни ҳарбий бўлмаган фуқаролар вакилларига топширишни бошлади. Бунга узоқ вақт давом этган изоляция туфайли мамлакат иқтисодида кескин чуқурлашиш юзага келгани ва Мьянмага нисбатан халқаро санкциялар жорий қилингани сабаб бўлди. Айни вақтда мамлакатдаги инфратузилмалар ўта ночор аҳволда, ижтимоий хизматлар (масалан, кўчалардаги чиқиндиларни йиғиштириш) эса деярли мавжуд эмас. Аун Сан Су Чжи бошқарувидаги "Демократия учун миллий лига" партияси мамлакат тарихида илк бор ўтказилган эркин сайловда устунлик қилиб, парламентда кўп ўрин олди. 329 ўринга эга бўлган бу партия мамлакат президентини тайинлаб, ҳукуматни шакллантириши мумкин. Мамлакат қонунчилигига кўра Аун Сан Су Чжининг ўзи президент бўла олмайди, чунки унинг турмуш ўртоғи британиялик, фарзандлари эса бошқа мамлакатлар фуқаролигига эга
DO'STLARINGA TAVSIYA ET!!!