0

Soufan Group: ИШИД таркибида Ўзбекистондан чиққан 500 жангари бор

АҚШнинг хавфсизлик соҳасида консультациялар бериш билан шуғулланадиган Soufan Group компанияси экспертлари Foreign Fighters (Хорижлик жангарилар. Сурия ва Ироққа чет элдан жангарилар келиши оқимининг янгиланган ҳисоб-китоблари) номли янги ҳисоботда таъкидланишича, охирги ярим йил ичида ИШИД таркибига қўшилган чет элликлар сони 2 баробарга ўсган. Таъкидланишича, айни кунларда Сурия ва Ироқда ИШИД байроқлари остида 86 мамлакатдан ташриф буюрган 27 мингдан 31 минггача чет элликлар курашмоқда. 2014 йил июнида бу кўрсаткич 12 минг кишига тенг эди. Компания таҳлилчилари бу ҳисоб-китобларда БМТ, ҳукуматлар ва академик доиралар келтирган маълумотларга асосланмоқда. Террорчи гуруҳ таркибида Ғарбий Европа вакилларининг сони 2 баробарга ошган бўлса, Россия ва Марказий Осиё жамоаси 3 марта кўпайган. Жадвалда берилган норасмий маълумотга кўра, ўзбекистонликлар сони 500 кишини ташкил этади. Бу борада энг кичик кўрсаткич Янги Зеландия (6 киши), Қатар (10 киши), Португалия (12 киши) ва БААда (15 киши) бўлса, энг кўп жангарилар Сурия ва Ироққа Тунис (7 минг киши), Иордания (2.5 минг киши), Саудия Арабистони (2.5 минг киши), Россия (2.4 минг киши, асосан Чеченистон ва Доғистон вакиллари), Туркия (2-2.2 минг киши), Марокаш (1.5 минг киши) ва Мисрдан (минг киши) келган. ИШИД таркибида Ғарбий Европа вакилларининг умумий сони 5 минг кишидан ошади. Уларнинг 4 минг нафари Франция, Буюк Британия, Германия ва Бельгия фуқароларидир. Шу билан бирга, Ғарбий Европа намояндаларининг аксарият қисми у ердаги ёпиқ мусулмон жамоаларидан келиб чиққани таъкидланмоқда. МДҲ давлатлари вакилларининг умумий сони 4.7 минг кишини ташкил қилган.
DO'STLARINGA TAVSIYA ET!!!